సెటైర్: చూస్తూనే ఉండండి టివీ 99

టివీ  99 న్యూస్ ఛానెల్ లో మళ్ళీ వార్తలొచ్చేస్తున్నాయ్. అసలే వానలు, ఆపైన వరదలు రావడంతో జనం కూడా రాత్రంతా టివీ సెట్లకే అంటిపెట్టుకున్నారు. టివీ 99 న్యూస్ యాంకర్ బ్రహ్మం స్క్రీన్ మీదకొచ్చేసి తన సహజధోరణిలో ఓ నవ్వునవ్వేసి, కర్నూలు ప్రతినిధి శ్రీరామ్ ని లైన్లో కలిపాడు.
బ్రహ్మం; హలో శ్రీరామ్,శ్రీరామ్: .....
బ్రహ్మం; వినబడటంలేదా... శ్రీరామ్...శ్రీరామ్
శ్రీరామ్: అడగండి బ్రహ్మం, (తనలో) అడిగేవాడికి చెప్పేవాడికి లోకువేగా.
బ్రహ్మం; కర్నూలులో వరద పరిస్థితి ఎలా ఉంది?
శ్రీరామ్: ఈ ప్రశ్న ఎన్నిసార్లు అడుగుతావ్ బ్రహ్మం. రాత్రంతా అడుగుతూనే ఉన్నావ్. చెబుతూనే ఉన్నా.
బ్రహ్మం; తప్పదు శ్రీరామ్. ఎప్పటికప్పుడు వార్తలందిస్తామని మనం కమిటయ్యాం.
శ్రీరామ్: ఎవడినడిగి కమిటయ్యారట. ఇక్కడ కాళ్లవరకు నీరొచ్చి తడిసిపోతుంటే.
బ్రహ్మం: చాలా చక్కని విషయం చెప్పావ్ శ్రీరామ్. మా ప్రతినిధి కాళ్లవరకు నీళ్లొచ్చాయ్. అక్కడ పరిస్థితి ఎప్పటికప్పుడు మీకందిస్తుంటామ్..ఇప్పుడో చిన్న బ్రేక్.
.. బ్రేక్....బ్రేక్...బ్రేక్...
బ్రహ్మం; వెల్ కమ్ బ్యాక్. ఆఁ చెప్పు శ్రీరామ్. కాళ్లకిందకు నీళ్లొచ్చాయ్ అని చెప్పావ్. ఇక్కడ మన ఎనలిస్ట్ బట్టతల బాపూరావ్ కాచుకుని ఉన్నార్. చెప్పు..చెప్పు...
శ్రీరామ్: నా చెప్పుతెగి నేనేడుస్తుంటే, మధ్యలో వాడూ వచ్చాడూ...సర్లే, ఆఫీస్ ఉప్పుతింటున్నాక చెప్పక తప్పుతుందా... అడగండి.
ఎనలిస్ట్ బాపూరావ్: చూడు శ్రీరామ్. కాళ్లవరకు నీళ్లొచ్చాయని చెప్పావ్. అరికాళ్లవరకా...మోకాళ్ల వరకా?
శ్రీరామ్: మోకాళ్లవరకు.
ఎనలిస్ట్ బాపూరావ్: కుడిమోకాలా, ఎడమమోకాలా?
శ్రీరామ్: రెండు మోకాళ్లురా..నీ యవ్వాఁ...
బ్రహ్మం: కూల్ డౌన్ శ్రీరామ్... కూల్ డౌన్. ఇంతకీ బాపూరావ్ గారు ఎందుకని ఆ ప్రశ్న వేశారో వారినే అడిగి తెలుసుకుందాం. చెప్పండి, బాపూరావ్.
ఎనలిస్ట్ బాపూరావ్: ఇప్పటికే మోకాళ్ల వరకు నీళ్లొచ్చాయంటే, మరో రెండు గంటల్లో మీ వాడి బొడ్డుదాకా కూడా నీళ్లు రావచ్చు. ఇన్ నైంటీన్ సెవంటీ సెవన్ లో దివిసీమలో కూడా...
బ్రహ్మం: బాపూరావ్ గారూ మీ ఎనాలసిస్ ఆపండి. ఇప్పుడొక కాలర్ మనకోసం ఎదురుచూస్తున్నారు. హలో...హలో చెప్పండి...
కాలర్: ఇందాకటి నుంచి  కర్నూల్ జిల్లా ప్రజల గురించి చెప్పకుండా మీ ప్రతినిధికి కాళ్లకిందకు నీళ్లొచ్చాయా, ఏ మోకాలు తడిసిందని చర్చ పెడతారా...ఆయ్ఁ... పనిలేని ఆ బట్టతల బాపూరావ్ గాడ్ని ఎందుకు పిలిచార్రా...నీ యవ్ఁ
.... బీప్...బీప్....
బ్రహ్మం: లైన్ కట్టయింది. మరో కాలొచ్చేలోపు శ్రీరామ్ ని అడిగి మరిన్ని విషయాలు తెలుసుకుందాం. చెప్పు శ్రీరామ్. పిల్లలెలా ఉన్నారు?
శ్రీరామ్: నా పిల్లల్ని సురక్షిత ప్రాంతానికి తరలించాను.
బ్రహ్మం: మనది న్యూస్ మీడియా శ్రీరామ్. మైక్ మందు మాత్రం  అందరి గురించే చెప్పుకోవాలి. సరే, మన కెమేరామన్ ఎలా ఉన్నాడు?
శ్రీరామ్: వాడా, కేమేరాను దండానికి కట్టి ఎప్పడో సురక్షిత ప్రాంతానికి చెక్కేశాడు.
బ్రహ్మం; ఆఁ, ఒకే...ఒకే. సరే, ప్రజలేమనుకుంటున్నారు?
శ్రీరామ్: కనబడితే తంతామంటున్నారు, బ్రహ్మం.
బ్రహ్మం: ఎవర్నీ! అధికారుల్నా?
శ్రీరామ్: కాదెహెఁ. మనల్నే.
బ్రహ్మం: (కట్ చేస్తూ) ఒకే, ఒకే శ్రీరామ్. మళ్ళీ కలుద్దాం. సరే, చివరి మాటలు చెప్పేసేయ్.
శ్రీరామ్: (తనలో) ఓహ్ఁ, ఇదొకటి ఏడ్చింది కదూ...(బిగ్గరగా) కెమేరాను దండానికి కట్టేసి పారిపోయిన కేమేరామన్ ప్రకాష్ తో పారిపోవడానికి సిద్ధమైన శ్రీరామ్. టివీ 99 కర్నూలు.

- కణ్వస

కన్నీళ్లే...

చినుకు
 అది,రాలకుంటే కన్నీళ్లు
చినుకు
 అది, రాలినా కన్నీళ్లే...

                               - కణ్వస

ఫోకస్: సెలవెందుకు దండుగ !

గాంధీ జయంతినాడు సెలవు ఇవ్వడం దండుగంటూ విదేశీవ్యవహరాల శాఖ సహాయ మంత్రి శశి థరూర్ సంచల వ్యాఖ్య చేశారు. దీంతో జాతీయ పర్వదినాలప్పుడు కూడా సెలవు ఇవ్వడం సబబేనా అన్న సందేహం మరోసారి తెరపైకెక్కింది. జాతిపిత మహాత్మ గాంధి జయంతని మనం ఓ పండుగలా జరుపుకుంటున్నాం. అందుకే ఆరోజున భారత ప్రభుత్వం సెలవు ప్రకటిస్తున్నది. అయితే, శశి థరూర్ మాత్రం గాంధీ జయంతి రోజున సెలవు ఇవ్వడం దండుగేనంటూ వాదిస్తున్నారు. ఇలా సెలవు ఇవ్వడం గాంధీ సిద్ధాంతాలకే విరుద్ధమన్నది ఈయనగారి వాదన. గాంధీ ఎప్పుడూ ఒక మాట అంటుండేవారనీ, పనిలోనే దేవుడున్నాడన్నదే ఆయన సిద్ధాంతమని, అలాంటప్పుడు ఆయన జయంతిరోజునాడు సెలవు ఇవ్వడం అపచారం చేసినట్టే అవుతుందని థరూర్ వాదిస్తున్నారు. అలాగే, జాతీయ పర్వదినాలప్పుడు కూడా సెలవ ఇవ్వకుండా పనిచేయిస్తే జాతీయ ఉత్పత్తి పెరుగుతుందన్నది ఆయన ధోరణి. మరి మీరు ఈ వాదనతో అంగీకరిస్తారా...శశిథరూర్ వ్యాఖ్యలపై మీ స్పందనను తెలియజేయండి.

సెటైర్: సానుభూతి ఉన్నప్పుడే సీఎం అవ్వాలి !

 తెల్లషర్ట్ , తెల్లప్యాంట్ వేసుకుని ఫుల్ హ్యాండ్ చేతులను కాస్తంత పైకి ముడిచి,  ఎడమచేతికి నల్లటి బెల్టున్న వాచీ పెట్టుకుని జగన్ అద్దం ముందు నిలబడి రాజకీయనేతగా తండ్రి వైఎస్సార్ స్టైల్ లో ప్రసంగపాఠాన్ని ప్రాక్టీస్ చేస్తున్నాడు.
జగన్: ఏ ఒక్కరికీ నష్టం కలుగకుండా, ఏ ఒక్కరికీ కష్టం కలుగకుండా చూస్తానూ...
వ్యాపారి జగన్: (అద్దంలో సడన్ గా ప్రత్యక్షమై) ఏమిటీ స్టైల్.. నీ సొంత స్టైల్ ఏమైందీ...?
జగన్: (ఆశ్చర్యంగా) అరే, ఎవరు నువ్వు... నన్నే ప్రశ్నిస్తున్నావ్?
వ్యాపారి జగన్: నల్లప్యాంట్, తెల్లషర్ట్..చూస్తే తెలియడంలా.. నేను వ్యాపారి జగన్ ని.
జగన్: అయితే, నాలో ఉండాల్సినవాడివి, బయటకెందుకొచ్చావ్!
వ్యాపారి జగన్: నువ్, ఫుల్ టైమ్ రాజకీయనేతగా మారాలని శపథం చేస్తే నేను నీలో ఎలా ఉండగలను, అందుకే బయటకువచ్చేశా.
జగన్: పిచ్చివాడా,  కోటి విద్యలూ కూటికొరకే. అసలు రాజకీయమే ప్రపంచంలోకెల్లా అతిపెద్ద వ్యాపారం. ఛాన్స్ వచ్చినప్పుడే చంకెక్కాలి. బూమ్ ఉన్నప్పుడే భూములు కొనాలి, సానుభూతి ఉన్నప్పుడే సీఎం అవ్వాలి. ఇదే జగన్ చెప్పే జీవిత సత్యం.
వ్యాపారి జగన్: అవునవును నాకీ `సత్యం' గురించి బాగానే తెలుసు.

సెటైర్: వెయిటింగ్ లిస్ట్ లో జగన్!

సీఎం పోస్ట్ కి వెయిటింగ్ లిస్ట్ లో జగన్ తన నెంబర్ ఎక్కడుందో, తన లక్కు ఎలా ఉందో చూడాలనుకున్నారు. ఢిల్లీ
విచారణ కార్యాలయంకి ఫోన్ చేస్తుంటే, లైన్స్ మూడు రాష్ట్రాల ఎన్నికలతో బిజీబిజీఅనీ, దయచేసి ఓ ఏడాది తరువాత
సంప్రదించమంటూ కబురొచ్చింది. కనీసం వెయిటింగ్ లిస్టులో నెంబర్ అయినా కనుక్కుందామని ఆన్ లైన్ నొక్కారు.
బీప్...బీప్...మంటూ ధ్వనించిన తరువాత ఢిల్లీ వాయిస్ వచ్చేసింది.
ఢిల్లీ సూచన: ఒకసారి టెన్ డిజిట్స్ ఉన్న పీఎన్నార్ నెంబర్, వైఎస్సార్ మొబైల్ నెంబర్ టైప్ చేయండి.
జగన్: ఆ చేశాను.
ఢిల్లీ సూచన: అలా చెప్పక్కర్లేదు. చేస్తే చాలు.
జగన్: ఐతే ఒకే.. తరువాత...
ఢిల్లీ సూచన: మీరెక్కాలనుకున్న ట్రయిన్ పేరు చెప్పండి.
జగన్: (ఏమాత్రం తడుముకోకుండా) ఏపీ పవర్ ఎక్స్ ప్రెస్...
ఢిల్లీ సూచన: ఏక్లాసట..?
జగన్: జబర్బస్త్ క్లాస్.
ఢిల్లీ సూచన: ఏ కోటాలో?
జగన్: వారసత్వ కోటాలోనే...
ఢిల్లీ సూచన: మీ వెయిటింగ్ లిస్ట్ డెభైఏడు...
జగన్: ఏడ్చినట్టే ఉంది. ఇంతమంది ఎక్కడి నుంచి వచ్చారు...నాకు ఒకటో నెంబర్ కావాల్సిందే.
ఢిల్లీ సూచన: వాళ్లంతా నీకంటే సీనియర్లు. పదేళ్లక్రితం అప్లై చేసుకున్నవారూ ఉన్నారు. ఒకటో నెంబర్ కుదర్దు.
పాతికేళ్లక్రదటి నుంచి పడికాపులుకాస్తున్న రోశయ్యకి నిన్ననే ఆర్ ఏ సీ నుంచి బెర్త్ కన్ఫర్మ్ చేశాం.
జగన్: ఐతే, నాకూ ఓ ఆర్ ఎ సీ తగలేయండి... అదే బెర్త్ లో ఓ మూల కూర్చుంటా...
ఢిల్లీ సూచన: కుదరదు. అలా చేస్తే రోశయ్యకు నిద్రపట్టదు. ప్రస్తుతం `జనం' బోగీలో రా... ఖాళీ వస్తే చూద్దాం.
- దళపతి (`నారదలోకం' - ఒంగోలు ప్రతినిధి)

జగన్ ఫ్లెక్సీని చింపిందెవరు?

ఖమ్మం జిల్లాలో సోనియాగాంధీ, రేణుకా చౌదరి చిత్రాలను ముద్రించిన ఫ్లెక్సీని చింపేసింది రేణుకా చౌదరి వర్గీయులేనంటూ న్యూస్ ఛానెళ్లు ఊదరగొట్టాయి. అంటే తన చిత్రాన్ని తానే చింపుకుందని ఆ ఛానెళ్లు గట్టిగా వాదించాయి. అలా చేయడంతో జగనానుచరుల మీద పడిన మచ్చ తొలిగిపోతుందని భావించారు. ఈ సంఘటన జరిగి వారంకాకుండానే హైదరాబాద్ లో జగన్ ఫోటో ఫ్లెక్సీని చింపేసిన సంఘటన వెలుగుచూసింది. దివంగత ముఖ్యమంత్రి వైఎస్సార్ చిత్రంతో పాటుగా ఎంపీలు జగన్, అంజన్ కుమార్ యాదవ్, మాజీ మంత్రి ఫరీదుద్దీన్ నేతల చిత్రాలున్న ఫ్లెక్సీని గోల్నాక అక్వా హోటల్ వద్ద చించేశారు. దీంతో స్థానిక కాంగ్రెస్ నేతలు, కార్యకర్తలు తీవ్ర నిరసన వ్యక్తం చేశారు. అలాగే, కాచిగూడ, అంబర్ పేటలో కూడా జగన్ చిత్రాలున్న ఫ్లెక్సీని చించివేసినట్టు వార్తలొచ్చాయి. వీహెచ్ అనుచరులే ఈ దురాగతానికి పాల్పడ్డారని జగనానుచరులు వాదిస్తున్నారు. అయితే నారదలోకం సేకరించిన సమాచారం ప్రకారం, ఈ పని వీహెచ్ అనుచరులు చేయలేదు. అది కచ్చితంగా జగనానుచరుల పనే. ఖమ్మం జిల్లాలో రేణుకా చౌదరి అనుచరులే రేణుక చిత్రపటాన్ని చింపేసినట్టు నమ్మే పక్షంలో నారదలోకం సేకరించిన ఈ సమాచారాన్ని కూడా మీరు నమ్మాల్సిందే. ఫ్లేక్సీలను చింపేసుకోవడం ద్వారా జగన్ కూడా రాజకీయ లబ్దిపొందాలనుకుంటున్నారట...నారాయణ..నారాయణ...

దిమ్మ తిరిగింది...

ఇటీవల రాష్ట్రంలో చోటుచేసుకున్న బస్సు దహనాలు, సోనియా గాంధీ చిత్రం చించివేత వంటి ఘటనలతో కాంగ్రెస్ అధిష్ఠానం వైఎస్ జగన్ అనుకూల శిబిరంపై గురిపెట్టింది. ఇందులో భాగంగా తాము నియమించిన ముఖ్యమంత్రి రోశయ్యను ధిక్కరిస్తున్న స్వరాల వివరాలను సేకరిస్తున్నట్లు సమాచారం. మరోవైపు రాజీనామా బెదిరింపులకు భయపడి ఒక వ్యక్తికోసం అనుకూల నిర్ణయం వెలువరించే ప్రసక్తే లేదని కేంద్రస్థాయి నాయకులతో తేల్చి చెప్పించింది. నాయకత్వ మార్పులను అధిష్ఠానం చూసుకుంటుందని, దానిపై చర్చించాల్సిన అగత్యం ప్రస్తుతం లేదని వెల్లడించింది. ఈ పరిణామం జగన్‌కు మద్దతు ఇస్తున్న వర్గాన్ని కుదేలు చేసినట్లు కనిపిస్తోంది. తాము ఒత్తిడి పెంచేకొద్దీ అధిష్ఠానం మరింత దృఢ వైఖరిని ప్రదర్శించడం జగన్ అనుకూల వర్గానికి మింగుడు పడటం లేదు. వైఎస్ జగన్‌కు ముఖ్యమంత్రి పదవి కట్టబెట్టాలంటూ డిమాండ్ చేస్తూ వస్తున్న కొందరు ఎమ్మెల్యేలు తమ స్వరాన్ని సవరించుకుంటున్నారు. తాము వైఎస్ జగన్ ముఖ్యమంత్రి అయితే బావుంటుందని చెప్పాం కానీ... ఆయననే ఖచ్చితంగా ముఖ్యమంత్రి చేయాలని అధిష్ఠానంపై ఒత్తిడి తేలేదని క్రమంగా జారుకుంటున్నారు. కాంగ్రెస్ అధిష్ఠానం ఇచ్చిన షాక్‌ను పసిగట్టిన జగన్ వర్గం దిద్దుబాటు చర్యలుకు ఉపక్రమించింది. గత 15 రోజులుగా పీసీసి చీఫ్ డి. శ్రీనివాస్ మాటను ఖాతరు చేయకుండా సభ్యత్వ నమోదులను అడ్డుకుంటున్న కార్యకర్తల జిల్లాలకు వైఎస్ జగన్ స్వయంగా వెళ్లనున్నట్లు భోగట్టా. సభ్యత్వ నమోదు కార్యక్రమాన్ని తానే స్వయంగా నిర్వహించాలని నిర్ణయించుకున్నట్లు తెలుస్తోంది. సోనియాగాంధీ తీసుకున్న నిర్ణయానికి కార్యకర్తలందరూ కట్టుబడి ఉండాలని తొలిసారిగా సోనియా పేరును ప్రస్తావిస్తూ కార్యకర్తలకు పిలుపునిచ్చారు జగన్. "ఆంధ్రప్రదేశ్‌లో ప్రస్తుత పరిస్థితి ఎలా ఉందో సోనియాగాంధీకి తెలుసు. ఈ పరిస్థితిలో అధిష్ఠానం తీసుకున్న నిర్ణయానికే మనందరం కట్టుబడి ఉండాలి. అంతేగానీ పార్టీని అప్రతిష్టపాలుచేసే ఎటువంటి చర్యకు పాల్పడరాద"ని వైఎస్ జగన్ కార్యకర్తలకు పిలుపునిచ్చారు. దీనిని బట్టి వైఎస్ జగన్ ముఖ్యమంత్రి అభ్యర్థిత్వంపై డిమాండ్ కాస్త మెత్తబడినట్లు తెలుస్తోంది. అయితే వైఎస్ జగన్ తన మకాన్ని బెంగళూరు నుంచి రాష్ట్రరాజధానికి మార్చుకోవడాన్ని చూస్తే... ఇకపై జగన్ రాష్ట్రంలో విస్తృతంగా పర్యటించి ప్రజలకు మరింత చేరువయ్యేందుకు కృషి చేస్తారని అర్థమవుతోంది. ప్రస్తుతం రాష్ట్ర ప్రజలలో వైఎస్సార్ పట్ల ఉన్న సానుభూతి పవనాలను తను ముఖ్యమంత్రి అయ్యేవరకూ సజీవంగా ఉంచుకునేందుకు ఖచ్చితంగా రాష్ట్రంలో జగన్ పర్యటన చేస్తారని రాజకీయ విశ్లేషకులు అభిప్రాయపడుతున్నారు.