ఫోకస్: డ్యామ్ లు కూల్చేసిన మీడియా!

 ఈ వార్త వినడానికి కాస్తంత ఆశ్చర్యంగానే ఉండవచ్చు. కానీ మన మీడియాకు ఉన్న `అతి' జబ్బుతో క్షేమంగా ఉన్న శ్రీశైలం, నాగార్జునసాగర్ డ్యామ్ లు కూలిపోయాయి. శుక్రవారం (అక్టోబర్ 2) ఒకటి రెండు టివీ ఛానెళ్లు చేసిన హడావుడి అంతాఇంతాకాదు. సంచలవార్తలు ఇవ్వందే పొద్దుగడవని ఏక సంఖ్య ఛానెల్, చీపురుపుల్లలా ఓ ఇంగ్లీష్ అక్షరాన్ని తగిలించుకున్న మరో ఛానెల్ మరీ పట్రేగిపోయాయి. జర్నలిస్ట్ ఎథిక్స్ ను నిలువునా సమాధి చేశాయి. కర్నూలు, మహబూబ్ నగర్ జిల్లాల్లో వరద వార్తలను ఎప్పటికప్పుడు చేరవేస్తున్నామన్న పేరుతో నోటికొచ్చిన వార్తలు చెప్పేశారు. ఆ దిక్కుమాలిన వార్తలను నిజం అని నమ్మేసిన కోట్లాది మంది గుండెలు అవిసిపోయాయి. సెప్టెంబర్ రెండున వైఎస్సార్ హెలికాప్టర్ ప్రమాదమప్పుడు ఎంతగా రెచ్చిపోయారో అంతకంటే ఎక్కువగానే ఈసారి పెట్రేగిపోయాయి ఛానెళ్లు. ఆ వివరాలు ఇప్పుడు చూద్దాం...

•  శ్రీశైలం ఆనకట్టు కూలిపోయింది. (ఒక ఛానెల్ లో వచ్చిన వార్త ఇది. అదే సమయానికి మరో ఛానెల్ రిపోర్టర్ శ్రీశైలం ఆనకట్టమీద నుంచే లైవ్ ఇస్తున్నాడు. మరి కూలితే ఇతగాడు ఎలా లైవ్ ఇవ్వగలిగాడు! మరో సత్యం వెలుగుచూసింది. ఇంతకాలం టెర్రరిస్టులే డ్యామ్ లు కూలుస్తారమోనని భయపడుతున్నాం, కానీ నిజం ఏమంటే, ఆ పని జర్నలిస్టులు కూడా చేయగలరు)
•  నాగార్జున సాగర్ డ్యామ్ కూడా కూలడానికి సిద్ధంగా ఉంది (పోటీగా మరో ఛానెల్ ఇచ్చిన వార్త)
•  కర్నూలంతా శ్మశాన నిశ్శబ్దం ఉంది (ఒక రిపోర్టర్ మైక్ ముందు పలికిన ప్రేలాపన. మరి ఇతగాడ్ని ఏ ప్రేతాత్మ ఆవహించిందో ఏమో...)
•  కర్నూలులో భూమి కంపించింది. వంద ఇళ్లు కూలిపోయాయి. రోడ్లు బీటలు వారాయి. (నిజానికి ఇళ్లు కూలింది వరదలకేగానీ భూమి కంపించి కాదు. అలాగే రోడ్లు బీటలుబారడం వరదలప్పుడు కూడా సహజంగా కనిపించే దృశ్యమే. సదరు రిపోర్టర్ కు ఈ రెంటి మధ్య వ్యత్యాసం తెలియలేదు.)
• ప్రముఖ వార్తా ఛానెల్ యాంకర్ వ్యాఖ్యలివి: `ఇది కాళరాత్రి. కర్నూలు రాత్రి పన్నెండు గంటల తరువాత ఏ క్షణంలోనైనా మునిగిపోవచ్చు. అక్కడ కరెంట్ కూడా లేదు. మా టివీ ఛానెల్ చూసే అవకాశం లేదు. (ఇది ఇతగాడి బాధ) కర్నూలు ఉండే మీ మిత్రులకు చెప్పండి. ఇళ్లు విడిచి, ఊరు విడిచి వెళ్లమనండి. ఇది కాళరాత్రి...రాత్రి పన్నెండు గంటలకు...' (తమ ఛానెల్ మెరుగైన సమాజం కోసమంటూ పదేపదే చెప్పుకునే ఈ ఛానెల్ ఆ రాత్రి భయపెట్టే వార్తలతో యావత్ సమాజం భయంతో వణికిపోయేలా చేసింది. మరి దీన్ని ఏ తరహా సేవ విజ్ఞులే తేల్చాలి.
•  `మీ దగ్గర టైర్లు, ట్యూబ్ లు ఉంటే, వరద బాధితులకు ఇవ్వండి' మరో సందేశం. మనమంతా ఇళ్లలో టైర్లూ, ట్యూబ్ లు పెట్టుకుని కూర్చున్నట్టు ఏమిటా వాగుడు. ఈ ప్రేలాపనల్లోని అసలు నిజం ఏమంటే, ఈ మధ్యనే పుట్టుకొచ్చన  `పుల్ల' ఛానెల్ పెట్రేగిపోవడంతో వెనకపడిపోతామన్న దిగులుతో ఈ ప్రముఖ ఛానెల్ సమాజసేవ ముసుగులో `బీభత్స నాటకాని'కి తెరలేపింది. నారాయణ...నారాయణ...