సెటైర్: కేసీఆర్ తిట్లకు అర్థాలే వేరులే

కేసీఆర్ వాక్చాతుర్యం అంతాఇంతాకాదు. ఆయన నోరు విప్పితే చాలు పవర్ ఫుల్ పదాలు దూకేస్తుంటాయి. అందుకే ఆయనగారి వ్యాఖ్యలు అత్యంత వివాదాస్పదమవుతుంటాయి. గొడవ ఎక్కువైతే, కేసీఆర్ చాలా తాపీగా `అంత లొల్లెందుకు, ఇదంతా మా తెలంగాణ యాస. మేమట్టనే అంటాం' అంటూ తేల్చిపారేస్తారు. కేసీఆర్ కంటి ఆపరేషన్ చేయించుకుని ఢిల్లీ నుంచి వరద బాధితులను పరమర్శించడానికని రాష్ట్రంలో కాలుమోపగానే తనదైన శైలిలో విరుచుకుపడ్డారు. పనిలో పనిగా హెలికాప్టర్ దిగుతూ పడ్డారు కూడా...కొద్దిలో ముక్కు నేలకు తాకే ప్రమాదం తప్పిపోయింది.
కేసీఆర్ తాజాగా విసిరిన పవర్ ఫుల్ మాటలు, వాటి అర్థాలు ఓ సారి చూద్దాం...
`దిక్కుమాలిన చావుచచ్చిన వైఎస్సార్ పీనుగ హైదరాబాద్ కు రాకముందే జగన్ ని సీఎం చేయాలని రాజ్ భవన్ యాత్రచేపట్టింది ఎవరు?'
కేసీఆర్ వ్యాఖ్యలకు ప్రతిపదార్థం చూద్దాం...
దిక్కుమాలిన= అనూహ్యంగా, దిగ్భ్రాంతికరంగా
చావుచచ్చిన= మరణించిన, మృతిచెందిన, కాలం చేసిన, స్వర్గస్థులైన, దివంగతులైన.
వైఎస్సార్ పీనుగ = వైఎస్సార్ శవం, వైఎస్సార్ మృతదేహం, వైఎస్సార్ పార్థివ శరీరం
ఇక కేసీఆర్ వ్యాఖ్యలోని అసలు భావం చూద్దాం..
`దిగ్ర్బాంతికరంగా, అనూహ్యంగా మరణించిన వైఎస్సార్ పార్థివ శరీరం హైదరాబాద్ కు చేరకముందే జగన్ ని సీఎం చేయాలని రాజ్ భవన్ యాత్ర చేపట్టింది ఎవరు?'
కేసీఆర్ తిట్లకు అర్థాలే వేరులే అని ఇప్పటికైనా మీరు నమ్ముతారా...

- కణ్వస

Tags: Telangana KCR Telugu